Föndurstund með frænku...

Ég fékk ótrúlega skemmtilega heimsókn um síðustu helgi. Amma og afi komu alla leið frá Akureyri með tvö lítil frænkuskott í farteskinu. Við skemmtum okkur konunglega! Fórum í sund, sáum Línu Langsokk og skólaleikrit hjá Litla, borðuðum rosalega mikið af smákökum og drukkum heitt kakó með og svo varð ég að sjálfsögðu að standa undir væntingum og slá upp föndurstund :)

Það verður aldrei lögð nægjanleg áhersla á það hversu mikilvægt það er að gefa börnum af tíma sínum. Veita þeim óskipta athygli, þó ekki sé nema í smá stund, það gefur svo margfalt til baka! Ég geri mér fulla grein fyrir því að oft er tíminn af skornum skammti, en stundum borgar sig bara að láta þvottinn bíða. Ég er svo langt frá því að vera saklaus og læt tölvuna allt of oft passa fyrir mig, en svona föndurstundir eru frábær leið til að kynnast börnunum okkar betur, þau eru skemmtilegt fólk. Ég vildi óska þess að ég gerði þetta oftar...

En að föndrinu, sem var einstaklega vel heppnað! Ég hugsaði með mér að þetta yrði að vera eitthvað tiltölulega einfalt því ég vissi ekki hversu öflugir föndrarar frænkurnar væru (það kom svo í ljós að þær eru alveg keppnis!). Þetta mátti helst ekki innihalda mikið límsull og svo finnst mér alltaf skemmtilegra þegar útkoman er eiguleg :)

Svo ég fór í Tiger. Þar fékk ég allt sem þarf: Skrautlegan pappír, vír, perlur, bönd og hringlaga piparkökuform í þrem stærðum. Það er að sjálfsögðu hægt að nota misstór glös eða hvað sem er! Svo var bara að byrja!

Við byrjuðum á að velja okkur pappír og teikna á hann eftir formunum og klippa út hringina. Þeir eru svo brotnir saman eins og sést á myndinni hér fyrir neðan. Því næst er klipptur passlega langur vírbútur og gerð lítil lykkja á annan endan. Svo er bara að þræða stærsta hringinn upp á vírinn. Næsta skref er að þræða 3-4 perlur á hann áður en að hringur númer tvö er settur á vírinn. Þetta er gert til að það myndist smá bil á milli pappíshringjanna á vírnum. Svo settum við aftur 3-4 perlur á vírinn áður en minnsti hringurinn var þræddur upp á hann. Í lokin voru svo settar nokkrar perlur á toppinn áður en gerð var lykkja á vírinn fyrir bandið. 

Þetta heppnaðist svona líka ljómandi vel hjá okkur en myndavélinn á símanum náði engan veginn að fanga fergurðina... ;)

Æi mér finnst þetta hrikalega krúttlegt! :)

Mig langar svo að lokum að minna ykkur á Facebook síðuna mína, en hana finnið þið HÉR. Endilega smella einu læki á hana.

Og svo eru það hálsmenin, loksins hægt að panta þau aftur eftir að þau seldust upp í nóvember. Tilvalið í jólapakkan handa litlum snúllum!

Pantanir mega berast á verkefnivikunnar@gmail.com eða í einkaskilaboðum á Facebook.

Góðar föndur-stundir... 

Innlit...

...Það fyrsta af mörgum!

Það er til svo mikið af smekklegu, handlögnu og hugmyndaríku fólki. Ég er umvafin slíkum snillingum. Allir veita þeir mér innblástur, hver á sinn hátt. Ég átti erindi til einnar gamallar og góðrar vinkonu minnar í vikunni (vinkonan er ekki gömul, ég er bara búin að þekkja hana rosalega lengi ;) ) og þá rak ég augun í aðventuskreytinguna hjá henni. 

,,Vá! En sniðugt! Hvar fékkstu þennan?" Spurði ég, og átti þá við kertavasann. Það kom þá upp úr kafinu að hún hafði gert sér lítið fyrir og búið hann til. Vasinn er úr Söstrene og límmiðarnir eru úr A4. 

Hugsunin er svo að strika yfir hvern dag sem líður fram að jólum með glærupenna! Mér finnst þetta alveg yfirmáta smart og skemmtileg hugmynd. Svo ef þú, lesandi kær, ert ekki búin að græja aðventukrans þá er þetta alveg málið. Einfalt og Fljótlegt!

Eigið nú alveg dásamlega helgi og reynið eftir fremsta megni að staldra aðeins við og bara njóta aðventunnar.

Öðruvísi jólaskraut...

...Á nokkrum mínútum!

Ég á töluvert af afgöngum frá því ég gerði diskamotturnar í síðustu viku og er með fullt af hugmyndum hvernig hægt væri að nýta svona krossviðsplötur í eitthvað skemmtilegt. Ég er rosalega oft spurð hvar ég fái allar þessar hugmyndir. Ég get eiginlega ekki sagt það. Ekki af því að ég vilji það ekki, heldur af því að ég veit það ekki. Og stundum finnst mér ég alls ekkert hugmyndarík. En ég skal samt reyna. Stundum sé ég eitthvað í tímaritum, á netinu eða bara út í búð sem mér finnst fínt og mig langar að prófa að gera. Stundum kasta ég öllu frá mér og rýk í málið, en stundum er hugmyndin að gerjast í kollinum á mér í langan tíma og svo bara allt í einu er ég búin að framkvæma hana án þess kanski að hafa ætlað mér það. Stundum geri ég bara nákvæmlega eins og einhver annar en stundum spretta nýjar hugmyndir af hugmyndum annara. Í þessu tilfelli var ég til dæmis ekkert að fara að gera neitt jólaskraut. Ég var bara að leika mér að því að prófa að mála á krossviðinn með málningu sem ég átti...

Þegar hingað var komið við sögu, lagði ég plöturnar bara frá mér. Svo í gær, röltum við Gummi Laugaveginn og kíktum meðal annars í verslunina Brynju. Og þar rak ég augun í þetta hér:

Og þá mundi ég eftir nokkru sem ég hafði einhverntíman séð og alltaf ætlað að prófa. Í því tilfelli voru notaðar hjarir í bland við skráargöt. Það var töluvert stærra en þetta sem ég gerði og límt á gamla skáphurð. Mjög fallegt en passaði ekki inn heima hjá mér.. Aðeins fáeinum mínútum eftir að ég kom heim var þetta svo tilbúið. Enda rosalega fljótlegt að líma bara stykkin á plöturnar með límbyssu.

Öðruvísi... en mér finnst þetta kúl!

Borð fyrir 4

Þegar ég labba inn í timbursöluna í Húsasmiðjunni þá upplifi ég mig rosalega matsjó... alveg þangað til ég mæti iðnaðarmönnunum og þeir fara að gefa mér auga. Þá langar mig helst til að segja; ,,Hey! Þú þarna! Já ég er að tala við þig... Ef þú vissir hvað ég er að fara að gera ótrúlega flottar diskamottur úr þessum spýtum þá myndir þú ekki stara svona á mig!" ;) Ekki misskilja mig, þetta er ekki illa meint, ég öfunda þá! Mikið væri ég til í að eiga svona ermalausan vinnusamfesting. Með allskonar vösum fyrir hitt og þetta. Og vera svo í hvítum afabol eins og fékkst í Guðsteini í gamla daga innanundir. Geta svo bara hent mér í hann á morgnana sett á mig derhúfuna og farið út á ,,verkstæði". Enginn maskari, hárblásari eða vesen! En ég á hvorki vinnusamfesting né verkstæði til að fara á, bara náttbuxur og bílskúr. Kanski seinna bara...

Það er búið að vera brjálað að gera síðastliðna viku. Fékk til mín hrúgu af konum á laugardagskvöldið í föndur sem ég þurfti að undirbúa og svo þarf ég víst stundum að vinna. Þannig að í gærmorgun var ég ekki byrjuð á verkefni þessarar viku. Ástæðan fyrir því að ég tek þetta fram er til að leggja ríka áherslu á hvað þetta er í alvörunni einfalt og fljótlegt! (Hafið þið heyrt þennan áður?) Ég semsagt gerði mér ferð í Timbursölu Húsasmiðjunnar og keypti af þeim hálfa 4mm birki-krossviðsplötu. Ég fékk ,,strákinn" á plötusöginni svo til að saga hana í eins margar 35x35 cm plötur og hægt var og svo afgangana í minni plötur sem ég ætla að nota í annað. En talandi um plötusög... Þetta ætti að vera staðalbúnaður á hverju heimili! Og Gummi, ef þú lest þetta, þá óska ég eftir einni slíkrí í jólagjöf! :)

En þetta fékk ég úr hálfri plötu:

Svo var bara að hefjast handa:

Ég þurfti að fara tvær umferðir með málningunni og átti samt afgang af þessari litlu túpu. Þegar málningin var orðin þurr fór ég tvær umferðir yfir þetta með vaxi til að gera yfirborðið vatnsfælið og mýkra viðkomu... Og útkoman, fjórar dásamlega fallegar diskamottur!

Það er eiginlega verst að jólin eru ekki að koma... Því ég er búin að leggja á borð!

Hlakka til næstu viku, knús í hús...

E.

Barnaherbergi tekið í nefið...

...helmingurinn af því allavegana ;)

Ég elska barnaherbergi. Þau bjóða upp á svo margt. Bæði í litavali, allskyns lausnum, skreytingum og bara nefndu það. Ég hef alltaf lagt mikinn metnað í herbergi strákanna minna og gengið í gegnum hin ýmsu tímabil í þeim efnum eins og td. Flexa tímabilið og Mammut tímabilið :D
Mér finnst mikilvægt að herbergi barnanna séu falleg, notaleg og vel skipulögð. Fyrir því eru margar ástæður en kanski helst vegna þess hversu miklum tíma er eytt þar við nám, leik og hvíld. Þetta eru svo ótrúlega mikilvægir staðir fyrir svo ótrúlega mikilvægt fólk!
Um daginn fékk ég verðugt verkefni. Ég var beðin um að innrétta herbergi fyrir lítinn tæplega tveggja ára vin minn sem er að eignast sitt fyrsta herbergi. Þetta var efniviðurinn:

Ég fékk í hendurnar gamalt rúm sem mamman svaf í þegar hún var lítil, litla kommóðu frá ömmu hennar sem við ákváðum að nýta sem náttborð, lítinn stól og eina einingu af gamalli Píra-hillu.
Svo mátti ég bara leika mér! Vei! Eins og þið sjáið er herbergið ekki stórt. Ég ætla að skjóta á ca. 5 fermetra, svo möguleikar á uppröðun voru ekki margir. Líka vegna þess að það er glerveggur með rennihurð á herberginu. En allt hefur möguleika og það var ekkert að gera nema bretta upp ermar og hefjast handa. Ég held ég leyfi myndunum bara að tala í þetta sinn...

Rúmið málaði ég með krítarmálningu frá Mörthu Stuart. Ég held næstum því að ég þurfi að eignast annað barn bara til að geta haft svona rúm heima hjá mér! Ég er gjörsamlega ástfangin af litnum!

Svo málaði ég Ribba myndarennu úr IKEA í sama lit fyrir ofan rúmið. Gulu skýin sem ég setti í rennuna til að passa bækurnar betur eru servíettustandar sem fást líka í IKEA. Svo setti ég uppáhalds barnabækurnar mínar í hilluna... Ef þið hafið ekki lesið Gunnhildi og Glóa og Blómin á þakinu fyrir börnin ykkar er kominn tími til! ;)
Púðarnir eru svo úr Rúmfatalagernum, allir nema þessi röndótti, en hann og rúmteppið eru úr IKEA.

Nafnaborðinn er úr versluninni Unikat, en fæst á fleiri stöðum. ,,Hillurnar" eru svo bara vírkörfur úr Söstrene Grene sem ég boraði fastar á vegginn. Töskurnar og póstkortin eru líka þaðan.

Það er smá saga að segja frá þessum. Litli vinurinn, sem á herbergið, á annan svona bangsa. Sá heitir Aggú. Aggú hefur fylgt honum hvert fótmál síðan hann var pínu peð. Af ótta við að Aggú glataðist og ekki fengist nýr keypti móðirin vara-Aggú. Mér fannst þetta frábær leið til að geyma hann einhversstaðar annarsstaðar en inn í skáp.  

Þessar fást svo í öllum regnbogans litum í rúmfatalagernum fyrir örfáar krónur!

Og ef maður finnur ekki réttu mottuna, þá heklar maður hana. Þessa heklaði ég úr afgangs garni sem ég lumaði á...

Og þá er bara hinn helmingurinn eftir... ég er aðeins búin að undirbúa mig og er æsispennt að halda áfram!

Þangað til næst... ;)

Stóra koparstjörnumálið...

Er þetta eitthvað grín eða? Þarf maður virkilega að fara að kaupa jólaskrautið í byrjun október ef maður vill endurnýja eitthvað? Þá komu allavegana jólin í IKEA voru bara búin korteri seinna... Bókstaflega. Ég fór líka af stað núna í byrjun nóvember og ætlaði að næla mér í ákveðna gerð af koparstjörnum á jólatréð sem ég missti af í fyrra og vitið menn, þær voru búnar! Búnar! 

"Já... ég man eftir þeim" sagði afgreiðslukonan þegar ég spurði um stjörnurnar. "Þær kláruðust nú bara um leið og þær komu!" Bætti hún svo við. "Já er það virkilega, hvenær var það eiginlega?" spurði ég þá og reyndi eftir fremsta megni að leyna vonbrigðum mínum. Þetta var jú bara jólaskraut, en ekki bráðnauðsynlegt hjálpartæki við athafnir daglegs lífs sem ég hafði misst af þarna. "Elskan mín, einhverntíman um miðjan október!" Svaraði hún þá og samúðin skein úr andliti hennar. Like á samúðafullu og skilningsríku afgreiðslukonuna! :D En fúli föndrarinn deyr ekki ráðalaus. Hann reddar sér.

Ég var oft búin að gjóa augunum á þennan vír hérna í Söstrene Grene:

 

150.- pakkinn, 2 metrar. Það er gjöf en ekki gjald myndi ég segja. Ég hlaut að geta beyglað hann í einhverskonar stjörnur! Og vitið menn, með stjörnulaga piparkökuform og litla vírtöng að vopni tókst mér þetta hér:

Og af því að þetta var svo auðvelt, já og ódýrt, þá hélt ég bara áfram!

Ég náði 18 stykkjum úr 4 pökkum af vír... sem gerir 33,333333 á stykkið! Mikið afskaplega held ég að gjaldkeri framkvæmdahallarinnar verði yfir sig kátur þegar hann sér þessa útreikninga og ég segi honum að stjörnur eins og ég ætlaði að kaupa kostuðu 800.- stk. Ég hlýt að fá feitan jólabónus í ár... ;)

Nú og af því að allir eru bara reddý fyrir jólin, búnir að skreyta og svona, þá henti ég í einn aðventukrans í leiðinni... :D

Það er u 6 breiðar tröppur af eldhúspallinum hjá mér og upp í stofu. Mér fannst alveg upplagt að skella aðventukransi þar...

Ég er svakalega sátt... verst að þessar elskur þurfi að safna ryki fram að mánaðarmótum.

En ég er allavegana tilbúin að taka á móti aðventunni!

:D