Staaaakur?!

Það býr hjá mér lítill álfur sem stelur stundum einum sokk. Hann stelur aldrei pari.. bara einum sokk. Stundum skilar hann sokknum en þá er ég yfirleitt búin að henda eða týna hinum! Ég er lengi búin að leysa þennan vanda með því að vera með taupoka í þvottahúsinu sem ég hef hent stökum sokkum í og svo þegar það er kominn slatti í pokann þá fer ég í gegnum sokkana og athuga hvort þar leynist kanski par.  Þetta fyrirkomulag hefur ekki verið vandræðalaust því ég nenni eiginlega aldrei að fara í gegnum pokann og nú var hann orðinn stútfullur. Í dag gekk ég svo vasklega til verks, fór í gegnum pokann og sá að álfurinn hafði skilað hvorki meira né minna en 32 stökum sokkum. (Það skal tekið fram að ég hafði ekki farið í gegnum pokann í rúmt ár) Það var löngu búið að bæta fjölskyldumeðlimum skaðann með sokkakaupum svo nú eigum við bara alveg rosalega mikið af sokkum! Ég ákvað svo að ráða bót á þessu máli og úr varð verkefni vikunnar:

Þetta er allt sem þarf... Ég sé það reyndar núna að ég hef skellt þarna Mod Podge dollu í staðinn fyrir málninguna sem ég notaði :D En þið ímyndið ykkur bara að þarna standi dolla af dásamlega fallega myntugrænni kalkmálningu frá Mörthu vinkonu minni Stuart... já og pensill! (Hvað er að mér? Roðn)

Svo var bara að skrifa textann á plötuna með límmiðunum, en þá fékk ég í Pennanum. Þeir fást reyndar út um allt. Svo átti ég þennan límrenning sem mér fannst upplagt að bæta við þetta.

Þá var ekkert að gera nema mála bara yfir herlegheitin...

...leyfa málningunni að þorna og taka svo límmiðana af!

Klemmurnar átti ég nú bara á snúrunni. Ég ætlaði fyrst að líma þær svona á plötuna, en ég sá fyrir mér að það myndi halda illa þar sem ég geri ráð fyrir að þetta verði í mikilli notkun ;)

Svo ég endaði á að festa snæri á plötuna sem ég límdi kirfilega aftan á hana með sterku teipi.

Og nú hangir þessi dásemd upp á vegg í þvottahúsinu mínu, ready to use! Ég held að mamma verði stolt af stelpunni sinni núna... ;)

   ...Þar til í næstu viku    

Innlit nr. 2

Í haust uppgötvaði ég snilldar leir, ég birti færslu um hann í nóvember og hana má sjá HÉR. Í desember hélt ég svo föndurkvöld með tveimur mismunandi saumaklúbbum þar sem við bjuggum til pakkaskraut og merkimiða eins og enginn væri morgundagurinn! 

Við fórum svolítið út af jólabrautinni eins og sjá má á meðfylgjandi myndum:

Hér er búið að þekja leirinn fyrst með servíettu og Mod Podge og þegar það hafði þornað voru dýramyndirnar límdar ofan á, líka með Mod Podge. Myndirnar eru bara teknar af netinu, prentaðar og klipptar út.

 Og hér eru dýramyndirnar bara límdar beint á leirinn með Mod Podge.

Þetta hjarta varð líka til á öðru þessara kvölda og mér finnst það alveg hreint gordjöss! Hér eru nokkrar perlur þræddar upp á grannan vír. Því næst er nokkrum lengjum af vírnum vafið saman og í lokin er mótað hjarta. 

Það er hins vegar ekkert sem gefur mér meira en þegar mér tekst að veita öðrum innblástur! Og inblásin af þessu brasi mínu fékk svo góð vinkona mín hugmynd. Hún er skólahjúkrunarfræðingur, smekkleg með endemum og starfar meðal annars í Tjarnarskóla. Hún fékk þá frábæru hugmynd að færa samstarfsfólki sínu þar litla jóla-önd á jólahlaðborði starfsmanna. Þetta er einfalt, fljótlegt og ódýrt en gleður tífalt meira en keyptur konfektkassi!

Þetta er bara alveg sjúklega sætt og getur vel verið heilsárs-önd!

Gleðilegt ár og TAKK!

Mig langar til að byrja þessa færslu á því að óska ykkur gleðilegs árs og þakka fyrir samfylgdina á árinu sem leið. Aldrei hefði mig órað fyrir því að svona stór hópur af fólki myndi fylgjast með brasinu í mér. Þegar ég byrjaði fyrir rúmu ári síðan hafði ég það bakvið eyrað að gefa þessu eitt ár. Ég var pínulítið smeyk um að það yrði of mikið fyrir mig að birta nýja færslu vikulega, en það varð ekki raunin. Þetta hefur flætt bara nokkuð áreynslulaust. Umferðin á síðunni hefur farið fram úr mínum villtustu vonum og þess vegna hef ég ákveðið að stækka aðeins umfang hennar. Þann 25. febrúar næstkomandi, á 35 ára afmælinu mínu, mun ég opna breytta og töluvert bætta heimasíðu, verkefnivikunnar.com. Ég er æsispennt og hlakka til að sjá hvert þetta ævintýri leiðir mig. Ég er með marga drauma fyrir árið 2015.

En að verkefni vikunnar. Sem er bara alls ekki verkefni síðustu viku heldur vikunnar fyrir jól! Ég setti mér algjörlega óraunhæft markmið einhverntíman á síðasta ári að allir fengju heimatilbúna jólagjöf frá mér þessi jól. Þetta var óraunhæft í fyrsta lagi vegna þess að ég gef fáránlega margar jólagjafir og í öðru lagi minnir mig að það hafi verið komið fram í október þegar ég ákvað þetta! Jebb, ég er mikil draumóramanneskja og í kollinum á mér er allt svo miklu einfaldara og fallegra en í raunveruleikanum :) En ég komst samt nokkuð langt með þetta og flestir fengu að minnsta kosti eitthvað heimatilbúið með í pakkann sinn.

Mér tókst til dæmis að búa til tíu sett af svona glasamottum:

Ég byrjaði á því að fara í BYKO og kaupa bara venjulegar hvítar veggflísar. Ég þvoði þær svo vel og vandlega áður en ég hófst handa.

Því næst límdi ég servíettur sem ég hafði valið á flísarnar með möttu Mod Podge. Ég lakkaði svo tvær umferðir yfir á eftir, líka með Mod Podge.

Undir glasamotturnar setti ég svo foam-blöð. Ég ætlaði að vera voða grand og setja kork undir þær en mér var lífsins ómögulegt að finna kork í þeirri þykkt sem ég vildi hafa hann.

Í lokin spreyjaði ég svo yfir herlegheitin með þessu spreyi hér, sem er vatns- og hitaþolið. Ég er ekki viss um að það þoli samt heitan pott beint af hellunni, en ég gerði margar tilraunir með heita bolla og teketil og það var allt í þessu fína!

Þessir á myndinni hér að ofan eru svolítið stærri en ég notaði nákvæmlega sömu aðferð við þá.

Nú svo var bara að pakka herlegheitunum inn í kassa frá Söstrene Grene!

Föðuramma mín hafði einhverntíman rétt fyrir jól grafið upp þessar mávastellsservíettur og gefið mér. Ekki veit ég hvað þær eru gamlar en að minnsta kosti 30-35 ára! Hún á að sjálfsögðu stellið, sem mér finnst með því fallegra sem ég hef séð! Ég á svo ótalmargar jólaminningar tengdar þessu stelli. Hún fékk að sjálfsögðu þessar:

Það hentaði ekki alveg að gefa öllum glasamottur. En armbönd og hálsmen er eitthvað sem allir nota svo ég skellti í nokkur svona:

Ég málaði nokkrar trékúlur með acryllitum frá Mörthu Stewart og blandaði með ómeðhöndluðum kúlum. Svo lífgaði ég uppá þetta með litlum koparperlum sem ég átti.

Ég gat eiginlega ekki sleppt því að gera hálsmen líka þar sem ég var svo ánægð með útkomuna á armböndunum...

Svo voru það þessar sem hvorki eru börn né fullorðnar. Þær fengu þessa útgáfu hér:

Það fóru svo að sjálfsögðu nokkur blómamen í pakkana eins eru í þessum pósti HÉR og að sjálfsögðu slatti af hekluðum tuskum og slaufum eins og þessum HÉR

Ég er byrjuð á jólagjöfunum fyrir næsta ár ;)

Hugmyndir af hekluðum jólagjöfum

Það er vika í jól. Úti er snarvitlaust veður, alveg eins og það á að vera í desember. Ég er búin að berjast í gegnum fjúkið að sækja Litla í skólann og við erum búin að fá okkur heitt kakó. Af því að samkvæmt öllum settum reglum í heimi níu ára, þá fær maður sér heitt kakó þegar svona viðrar!

Ég setti mér það markmið í haust að sem flestir fengju heimatilbúnar jólagjafir í ár. Að minnsta kosti að hluta. Ég skal viðurkenna að þetta er búið að valda mér töluverðum höfuðverkjum svona inn á milli, og ég er oft búin að hætta við. En þetta er að hafast, svona nokkurnveginn...
Og af því að ég ætlaði að vera komin í jólafrí frá blogginu, en get ekki slitið mig frá því, þá langar mig að nota þessa viku til að deila með ykkur tveimur hugmyndum af tiltölulega fljótlegum og afar einföldum hekluðum hugmyndum af jólagjöfum. Þetta eru engin geimvísindi, en voða sætt... :)

Í fyrsta lagi tekur ekki nema klukkutíma að hekla eina svona og ganga frá henni. Að því gefnu að maður eigi allt í hana að sjálfsögðu...

Og þær taka sig svona brjálæðislega vel út í kössum sem ég keypti í Söstrene Grene:

Það tók mig smá tíma að átta mig á hversu margar lykkjur þyrfti, en á endanum komst ég að því að í fullorðinsslaufu er 14 lykkjur á heklunál nr 4,5 passlegt og 10 lykkjur í barnaslaufu. Svo er bara að hekla fram og til baka þar til tvöfaldri lengd á slaufunni er náð og svo er hún saumuð saman í hliðunum og tekin saman í miðjunni. Mér fannst koma betur út að nota efni til að taka þær saman en að hekla lítinn renning. Ég notaði aðferð sem kallast tweed-hekl í mínar slaufur.

Og svo í öðru lagi tekur um það bil tvær klukkustundir að hekla eina svona tusku...

Og þær eru frábær leið til að æfa sig á nýjum aðferðum við heklið, bæði í stykkjunum sjálfum og köntunum. Í þessar notaði ég að sjálfsögðu 100% bómull og fylgdi leiðbeiningum af munstrunum úr Stóru handavinnubókinn.

Æi sjáiði hvað þær eru sætar! 

Þá er ekkert að gera nema spýta í lófana og halda áfram...

Tíu tuskur to go!

;)

Föndurstund með frænku...

Ég fékk ótrúlega skemmtilega heimsókn um síðustu helgi. Amma og afi komu alla leið frá Akureyri með tvö lítil frænkuskott í farteskinu. Við skemmtum okkur konunglega! Fórum í sund, sáum Línu Langsokk og skólaleikrit hjá Litla, borðuðum rosalega mikið af smákökum og drukkum heitt kakó með og svo varð ég að sjálfsögðu að standa undir væntingum og slá upp föndurstund :)

Það verður aldrei lögð nægjanleg áhersla á það hversu mikilvægt það er að gefa börnum af tíma sínum. Veita þeim óskipta athygli, þó ekki sé nema í smá stund, það gefur svo margfalt til baka! Ég geri mér fulla grein fyrir því að oft er tíminn af skornum skammti, en stundum borgar sig bara að láta þvottinn bíða. Ég er svo langt frá því að vera saklaus og læt tölvuna allt of oft passa fyrir mig, en svona föndurstundir eru frábær leið til að kynnast börnunum okkar betur, þau eru skemmtilegt fólk. Ég vildi óska þess að ég gerði þetta oftar...

En að föndrinu, sem var einstaklega vel heppnað! Ég hugsaði með mér að þetta yrði að vera eitthvað tiltölulega einfalt því ég vissi ekki hversu öflugir föndrarar frænkurnar væru (það kom svo í ljós að þær eru alveg keppnis!). Þetta mátti helst ekki innihalda mikið límsull og svo finnst mér alltaf skemmtilegra þegar útkoman er eiguleg :)

Svo ég fór í Tiger. Þar fékk ég allt sem þarf: Skrautlegan pappír, vír, perlur, bönd og hringlaga piparkökuform í þrem stærðum. Það er að sjálfsögðu hægt að nota misstór glös eða hvað sem er! Svo var bara að byrja!

Við byrjuðum á að velja okkur pappír og teikna á hann eftir formunum og klippa út hringina. Þeir eru svo brotnir saman eins og sést á myndinni hér fyrir neðan. Því næst er klipptur passlega langur vírbútur og gerð lítil lykkja á annan endan. Svo er bara að þræða stærsta hringinn upp á vírinn. Næsta skref er að þræða 3-4 perlur á hann áður en að hringur númer tvö er settur á vírinn. Þetta er gert til að það myndist smá bil á milli pappíshringjanna á vírnum. Svo settum við aftur 3-4 perlur á vírinn áður en minnsti hringurinn var þræddur upp á hann. Í lokin voru svo settar nokkrar perlur á toppinn áður en gerð var lykkja á vírinn fyrir bandið. 

Þetta heppnaðist svona líka ljómandi vel hjá okkur en myndavélinn á símanum náði engan veginn að fanga fergurðina... ;)

Æi mér finnst þetta hrikalega krúttlegt! :)

Mig langar svo að lokum að minna ykkur á Facebook síðuna mína, en hana finnið þið HÉR. Endilega smella einu læki á hana.

Og svo eru það hálsmenin, loksins hægt að panta þau aftur eftir að þau seldust upp í nóvember. Tilvalið í jólapakkan handa litlum snúllum!

Pantanir mega berast á verkefnivikunnar@gmail.com eða í einkaskilaboðum á Facebook.

Góðar föndur-stundir...